Napórany:
Dataje AutoConfig daju se wužywaś, aby nastajenja póstajili a zastajili, kótarež kupkowe směrnice Firefox njewótpópadnu.
Aby AutoConfig wužywał, stajśo dwě dataji do zarědnikow Firefox. Na Windows wobej do toho samskego zapisa słušatej, źož Firefox jo zainstalěrowany. Na macOS słušatej do zapisa Contents/Resources nałoženja Firefox.app.
Prědna dataja, kótaruž musyśo napóraś, se autoconfig.js groni a składujo se do zarědnika defaults/pref. Wóna měła slědujucej dwě smužce wopśimowaś:
pref("general.config.filename", "firefox.cfg");
pref("general.config.obscure_value", 0);
Prědna smužka mě dataje AutoConfig pódawa. Móžośo někake mě pódaś, ale městno dataje njedajo se změniś.
Druga smužka pódawa, až njocośo, až ma se AutoConfig zamazaś. Pó standarźe Firefox wócakujo, až dataja jo wó 13 bajtow pśesunjona, aby se wopśimjeśe zamazało.
Druga dataja, kótaruž musyśo napóraś, se firefox.cfg groni a składujo se na nejwušej rowninje.
Wóna měła se pśecej z komentarowej smužku zachopiś:
// IMPORTANT: Start your code on the 2nd line
Lěcrownož kóńcowka dataje AutoConfig jo zwětšego cfg, jo dataja AutoConfig sama dataja JavaScript. To groni, až móžośo JavaScript do dataje pisaś, aby rozdźělnu logiku w rozdźělnych situacijach wužywał.
Slědujuce funkcije su w dataji AutoConfig k dispoziciji:
pref(prefName, value) – póstaja wužywaŕsku gódnotu nastajenja. Toś ta funkcija nastajenje eksplicitnje ako wužywaŕske nastajenje póstaja. To groni, až, jolic wužywaŕ jo změnił gódnotu, wóna se kuždy raz slědk staja, gaž se wobglědowak startujo.
defaultPref(prefName, value) – póstaja standardnu gódnotu nastajenja. To jo gódnota, kótaruž nastajenje ma, gaž wužywaŕ njejo nastajił gódnotu.
lockPref(prefName, value) – póstaja standardnu gódnotu nastajenja a zastaja ju. To jo funkcija, kótaraž jo nejwěcej luźim znata, gaž cośo z datajami AutoConfig źěłaś. Zastajanje nastajenja zajźujo tomu, až wužywaŕ jo změnja, a w nejwěcej padach se wužywaŕski pówjerch w nastajenjach znjemóžnja, tak až jo wužywarjeju jasnje, až nastajenje jo znjemóžnjone. W padach, gaž nic znjemóžnjone w nastajenjach njewiźiśo, daju někotare nastajenja „disable_button“, kótarež tłocaški znjemóžnjaśo, gaž su zastajone. Jolic na pśikład nastajenje
pref.privacy.disable_button.view_passwords
zastajaśo, se tłocašk „Gronidła pokazaś“ znjemóžnijo. Druge nastajenja, kótarež tłocaški znjemóžnjaju, su:
pref.general.disable_button.default_browser pref.browser.homepage.disable_button.current_page pref.browser.homepage.disable_button.bookmark_page pref.browser.homepage.disable_button.restore_default security.disable_button.openCertManager security.disable_button.openDeviceManager app.update.disable_button.showUpdateHistory pref.privacy.disable_button.cookie_exceptions pref.privacy.disable_button.view_cookies pref.privacy.disable_button.view_passwords pref.privacy.disable_button.view_passwords_exceptions pref.downloads.disable_button.edit_actions.
unlockPref(prefName) – wótwórja nastajenje. Daju snaź pady, źož nastajenje za wše zastajaśo a jo za jadnotliwego wužywarja wótwórjaśo.
getPref(prefName) – wótwołujo gódnotu nastajenja. Jolic nastajenje njeeksistěrujo, se zmólka pokažo. Wužywajśo to janož, gaž wěsćo, až nastajenja eksistěruju.
clearPref(prefName) – wótwónoźujo wužywaŕsku gódnotu nastajenja a staja jo na jogo standardnu gódnotu.
displayError(funcname, message) – pokazujo zmólku we wěstem formaśe.
Netscape.cfg/AutoConfig failed. Please contact your system administrator. Error: [funcname] failed: [message]
To jo praktiske za pytanje zmólkow.
getenv(name) – zmóžnja wam, wokolinowe wariable wótpšašowaś. To wam na pśikład zmóžnja, wužywaŕske mjenja a druge systemowe informacije wótwołowaś.
Jolic cośo swóju dataju AutoConfig centralnje zastojaś, móžośo městno sekundarneje dataje AutoConfig w primarnej dataji AutoConfig pódaś:
pref("autoadmin.global_config_url","http://yourdomain.com/autoconfigfile.js");
URL móžo kuždy protokol byś, kótaryž se pśez Firefox pódpěra. K tomu file-protokol słuša: protokol, kótaryž na dataju na seśowem běgadle pokazujo. Format zdaloneje dataje autoconfig je samska ako dataja autoconfig na klienśe, jano až prědna smužka se njeignorěrujo.
Jolic cośo informacije w swójej konfiguraciji měś, kótarež su specifiske za wužywarja, móžośo druge nastajenje póstajiś:
pref("autoadmin.append_emailaddr", true);
To prašak (?) pśipowjesa a e-mailowu adresu za napšašowanje.
Źiwaśo se snaź tomu, wótkulž ta e-mailowa adresa pśiźo. Dokulaž Firefox e-mailowe adrese njewužywa, musyśo ju nastajiś. Jolic to njecyniśo, buźo se was Firefox za e-mailoweju adresu pšašaś. Nastajenje se mail.identity.useremail groni a jo nastajenje typa znamuško. Dokulaž dataja autoconfig jo javaskriptowa dataja, móžośo toś to nastajenje póstajiś, nježli až autoadmin.global_config_url póstajaśo, na pśikład
var user = getenv("USER"); lockPref("mail.identity.useremail", user); lockPref("autoadmin.global_config_url","http://yourdomain.com/autoconfigfile.js");
Daju někotare druge nastajenja, kótarež aspekty AutoConfig wóźe. autoadmin.refresh_interval AutoConfig pó danym interwalu w minutach aktualizěrujo. Daju teke někotare nastajenja nastupajucy to, kak se z offline wobchada, mjazy nimi autoadmin.offline_failover a autoadmin.failover_to_cached. Tak funkcioněruju:
Kuždy raz, gaž se dataja AutoConfig zdaloka wótwołujo, se zawěsćeńska kopija teje dataje w profilowem zarědniku wužywarja napórajo, kótaraž se failover.jsc groni. Jolic nastajenje autoadmin.failover_to_cached jo na false stajone, Firefox pufrowanu dataju cyta a markěrujo pón wobglědowak ako offline a zastaja nastajenje, až njeby wužywaŕ online šeł. Jolic nastajenje jo na true stajone, wužywa jadnorje pufrowanu dataju a pókšacujo. Nastajenje autoadmin.offline_failover wóźi, lěc pufrowana dataja se wužywa abo nic, gaž wužywaŕ jo jadnorje offline. Jolic na true stajone, se pufrowana dataja wužywa.
