Z funkciju Filelink Thunderbird móžośo wjelike pśidanki do mrokawy nagraś a wótkaz pósłaś, město togo aby je direktnje k swójej mejlce pśipowjesył. Toś ta funkcija se pśez dodanki póbitowarjow Filelink póbitujo.

Funkcija Filelink Thunderbird

Wjele e-mailowych serwerow njeakceptěrujo powěsći z wjelikimi datajowymi pśidankami. Wobgranicowanje datajoweje wjelikosći wariěrujo pó konfiguraciji e-mailowego serwera. Samo gaby mógał powěsć z wjelikim pśidankom słaś, dostawajucy e-mailowy serwer by mógał powěsć z wjelikim pśidankom wótpokazaś. Thunderbird njama na to žeden wliw.

Funkcija Filelink Thunderbird eliminěrujo toś ten problem pśez to, až staja pódpěru za składowańske słužby online k dispoziciji. Zmóžnja wam, pśidanki k składowańskej słužbje online nagraś a wuměnja pśidanki w powěsći z wótkazom na składowańsku słužbu online. Dostawaŕ powěsći kliknjo na wótkaz, aby pśidank ześěgnuł. Ako pśidatny wužytk sćelu a dostawaju se wjelike dataje wó wjele malsnjej, a wój z dostawarjom žaritej rum na plaśe.

Móžośo teke Filelink Thunderbird pśidatnje k regularnym pśidankam wužywaś. Móžośo na pśikład małe dataje direktnje k powěsći pśidaś a Filelink za wjelike pśidanki w tej samskej powěsći wužywaś.

Zgromaźeństwo Thunderbird jo teke rěd dodankow póbitowarjow Filelink za wšake póbitowarje (dalšne drobnostki dołojce) k dispoziciji stajił.

Filelink pśidaś

Aby toś tu funkciju wužywał, musyśo nejpjerwjej jaden z dodankow póbitowarjow Filelink instalěrowaś, ako dołojce wopisane. Za někotare póbitowarje składowańskeje słužby online musyśo snaź nejpjerwjej nowe konto załožyś abo eksistěrujuce konto za nje konfigurěrowaś.

• Klikniśo na ≡ > Nastajenja > Pisaś > Pśidanki > Dalšne póbitowarje namakaś...
• Wubjeŕśo dodank póbitowarja Filelink a klikniśo na ＋ K Thunderbird pśidaś.
• Wobkšuśćo pšawa dodanka z wuskokujucego wokna z Pśidaś.
• Klikniśo we wótrězku Pśidanki nastajenjow (glejśo górjejce) na tłocašk [Wašogo póbitowarja FileLink] pśidaś.
• Pśidajśo informacije, kótarež se dodank pomina.
• Thunderbird wam naraźijo, Filelink za pśidanki wužywaś, kótarež su wětše ako 5 MB (móžośo toś tu gódnotu w tom samskem wótrězku změniś), abo móžośo z pšaweju tastu na normalny pśidank kliknuś, aby jen konwertěrował.

Filelink wužywaś

Gaž k powěsći dataju pśipowjesaśo a datajowa wjelikosć górjejce pódanu wjelikosć pśekšacujo, buźo wam Thunderbird awtomatiski póbitowaś, Filelink wužywaś:

• Klikniśo na tłocašk Zwězaś, aby dataju k składowańskemu słužbnemu póbitowarjeju online nagrał.
• Jolic lubjej dataju ako regularny pśidank pśipowjesyś, wubjeŕśo Ignorěrowaś.

Za tym až sćo wburał Zwězaś, buźo se waša dataja w slězynje nagrawaś a pokazana powěźeńka buźo se aktualizěrowaś na:

Gaž zwězowanje jo dokóńcone – to groni, gaž waš pśidank jo k słužbnemu póbitowarjeju nagraty – buźo Thunderbird awtomatiski wótrězk w powěźeńce pśidawaś, z wótkazom ku kopiji wašeje dataje online, glejśo dołojce:

Gaž waše dostawarje powěźeńku dostanu, budu tu samsku informaciju wiźeś a gaž na wótkaz w powěźeńce klikaju, wjadu jich k bokoju, wótkulž móžośo pśidank ześěgnuś.

Cesto stajone pšašanja wó Filelink

Pśidanki, kótarež pśez Filelink sćelośo, se na serwerach Thunderbird njeskładuju. Kuždy póbitowaŕ słužby składowanja datajow ma swójske pšawidła priwatnosći a wužywańske wuměnjenja. Póbitowaŕ słužby składowanja datajow jo pśeglědał funkciju Filelink, aby zawěsćił, až wóna jogo pšawidłam wótpowědujo.

Wě Thudnerbird, kótarego póbitowarja wužywaŕ jo wubrał?

Ně. Thunderbird njewě, kótarego póbitowarja wužywaŕ jo wubrał. Konfiguracija póbitowarja se lokalnje na wašom licadle składujo.

Kótare składowańske słužby se tuchylu pódpěraju?

• Rěd woblubowanych póbitowarjow składowanja datajow se pśez dodanki póbitowarjow Filelink pódpěra.
• Móžośo teke Filelink z pomocu dodanka Filelink provider for WebDAV ze swójim nejlubšym WebDAV-serwerom wužywaś.

Móžo se póbitowaŕ składowańskeje słužby móje pśidanki woglědaś?

Póbitowarje składowańskeje słužby mógu se dataju woglědaś, ako kuždy, kótaryž wótkaz k pśidankoju dostawa, snaźkuli koděrujośo dataju, nježli až ju nagrawaśo. Wužywarje same muse rozsuźiś, kótaremu słužbowemu póbitowarjeju how z teju zagronitosću dowěriśo. Słužbne póbitowarje zwětšego waše priwatnostne pšawa w swójich wužywańskich wuměnjenjach wujasnjuju.

Źiwajśo na to, až standardna pśidankowa funkcionalnosć teke njejo skoděrowana. Gaž pśidank na „normalny“ nałog sćelośo, bźez togo aby funkcije OpenPGP a SMIME Thunderbird wužywał, ma kuždy pśistup na dataju, kótaryž ma pśistup na powěsć mjazy wašym systemom a systemom dostawarjow (na pśikład póbitowaŕ e-mailoweje słužby). Filelink bitujo wěstu wěstotu, dokulaž se datajowe nagraśa k póbitowarjeju składowańskeje słužby pśez HTTPS, wěsty protokol, sćelu. Pórucujomy, až funkcije Thunderbird OpenPGP abo SMIME wužywaśo, aby maksimalnu wěstotu za swóje komunikacije zawěsćił.

Kak dłujko buźo mója dataja na sedle składowańskego słužbnego póbitowarja k dispoziciji?

We wótwisnosći wót wuměnjenjow wašogo tśeśego składowańskego słužbnego póbitowarja a wašogo słužbnego dojadnanja z nim, buźo dataja na sedle póbitowarja za wobgranicowany cas k dispoziciji, za wěstu licbu ześěgnjenjow abo daniž ju na pśecej njewulašujośo. Musyśo se pla websedła póbitowarja pśizjawiś, aby dataje w swójom wósobinskem składowańskem rumje woglědał a wulašował.

Móžośo słužbnego póbitowarja X abo protokol Y pódpěraś?

Pšosym pśeglědujśo, lěc zgromaźeństwo Thunderbird jo dodank póbitowarja Filelink za słužbnego póbitowarja, za kótarymž pytaśo. Wuwijaŕska dokumentacija za API Filelink jo k dispoziciji.

Njamógu se z myslicku spśijaseliś, móje dataje pla tśeśich póbitowarjow ako toś ten składowaś. Funkcioněruju hyšći normalne pśidanki?

Normalne e-mailowe pśidanki hyšći kaž pśecej funkcioněruju. Póbitujomy jano móžnosć, wjelike pśidanki něźi nagraś, jolic to cośo. Standardna wjelikosć wjelikeje dataje jo 5 MB, ale dajo se w nastajenjach Thunderbird pśiměriś:

1. Klikniśo na ≡ > Nastajenja > Pisaś > Pśidanki
2. [✓] Dataje nagraś, kótarež su wětše ako [ 5] MB

Gaž kokulku wótwónoźujośo, se awtomatiska powěźeńka Filelink pódtłocujo, gaž wjelike dataje pśipowjesaśo, ale funkcija Filelink buźo hyšći z wuběrańskego menija tłocaška Pśipowjesyś | v ako teke z drugich pśidankowych a kontekstowych menijow k dispoziciji.